O obxectivo das xornadas, que reuniron por segundo ano consecutivo a expertos de distintas administracións autonómicas, é avanzar nunha mellor aplicación do sistema tributario fomentando o intercambio de coñecementos e a coordinación entre administracións

• A directora da Atriga clausurou as II Xornadas Tributarias de actualización dous criterios de actuación non ámbito tributario autonómico 
• O foro busca o intercambio de coñecementos e a coordinación como claves para aplicar un sistema tributario máis xusto e eficiente, con presenza de empregados públicos doutras comunidades autónomas 

Santiago de Compostela, 8 de maio de 2026 | Axencia Tributaria de Galicia(Atriga) 

A directora da Axencia Tributaria de Galicia (Atriga) clausurou as II Xornadas Tributarias de actualización de criterios no ámbito tributario autonómico, celebradas na Escola Galega de Administración Pública (EGAP). O foro, que reúne por segundo ano consecutivo a empregados públicos da Atriga e doutras administracións públicas, busca o intercambio de coñecementos e a coordinación como claves para a aplicación dun sistema tributario máis xusto e eficiente.

As xornadas abordaron a transcendencia dos activos líquidos na empresa e a súa afectación á actividade a efectos do beneficio fiscal no Imposto sobre o Patrimonio (IP) e no Imposto sobre Sucesións e Doazóns (ISD), poñendo de manifesto a importancia capital da documentación e a proba neste tipo de análise. 

O programa incluíu tamén a análise do contrato vitalicio, figura exclusiva do dereito civil galego mediante a cal unha persoa cede os seus bens a quen se compromete a prestarlle coidados e asistencia para sempre, e a reforma tributaria acometida pola Comunidade Autónoma no ITP e o ISD. A directora da Atriga cualificou a reforma de prudente e avanzou que se seguirá a súa evolución para valorar se precisa de axustes adicionais no marco das competencias normativas autonómicas. 

As xornadas dedicaron así mesmo unha sesión aos pactos sucesorios nos réximes do País Vasco, Cataluña e Galicia, e á análise da súa tributación no IRPF á luz da sentenza do Tribunal Supremo e a reforma do artigo 33 da LIRPF. O modelo vasco foi sinalado como referente de adaptación coordinada do dereito civil e fiscal ás novas realidades. A xornada do venres completou o programa con cuestións procedimentais e xurisprudenciais: a doutrina do dobre tiro, a constitucionalidade do valor de referencia, a última xurisprudencia no ámbito recadatorio e o interese casacional en materia tributaria. 

Na súa intervención de clausura, a directora da Atriga agradeceu o esforzo de todos os relatores por sintetizar con rigor materias de gran complexidade, así como o labor de organización da área de Coordinación da Atriga e do equipo da EGAP, cuxa sede acolleu o evento. Os relatorios quedarán dispoñibles proximamente na aula Virtual.