- A anulación destas débedas evita recadacións que ocasionan perdas para a facenda pública
- Afecta a 933 débedas dun importe medio de 1,34 euros
Santiago de Compostela, 31 de maio de 2026.- O Diario Oficial de Galicia (DOG) publicou unha resolución conxunta da Axencia Tributaria de Galicia (Atriga) e da Intervención Xeral da Comunidade Autónoma pola que se acorda a anulación e baixa en contabilidade de todas aquelas liquidacións que se encontren en período executivo e das cales resulte unha débeda pendente de recadar por un importe inferior aos tres euros.
A anulación de débedas residuais realízana de xeito periódico todas as administracións tributarias. O seu obxectivo é evitar actuacións recadatorias que supoñen unha perda para a facenda pública, xa que nestas liquidacións xéranse uns custos superiores aos recursos que potencialmente se puidesen obter coas mesmas.
As actuacións previstas na resolución publicada no DOG efectuaranse en relación coas liquidacións das cales resulte unha débeda pendente inferior á referida cantidade a 31 de decembro de 2025. Neste caso, suporá a anulación de 933 débedas que suman un total de 1.249,26 euros, é dicir, un importe medio de 1,34 euros por cada débeda anulada. O importe cancelado é irrelevante posto en relación co total da débeda xestionada en executiva (un 0’004 %).
